ភ្នំពេញ៖ មន្រ្តីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បានរកឃើញទំនិញ ពពុះសណ្តែក មានផ្ទុកសារធាតុបូរ៉ាក់ (Borax) ៩គីឡូក្រាម ព្រមទាំងទំនិញពុំមានអនុលោមភាពផ្សេងទៀតនៅក្នុង ៤ខេត្ត-ក្រុង។

មន្រ្តីសាខា ក.ប.ប. ខេត្តត្បូងឃ្មុំ កំពង់ស្ពឺ ព្រះសីហនុ និងរាជធានីភ្នំពេញ បានចុះត្រួតពិនិត្យផលិតផលទំនិញនៅតាមបណ្តាផ្ទះលក់ទំនិញ និងទីផ្សារនានា ដោយបានធ្វើតេស្តបឋមលើទំនិញហូបចុក និងត្រួតពិនិត្យយ៉ាងហ្មត់ច៉ត់លើទំនិញចម្រុះគ្រប់ប្រភេទ នាថ្ងៃទី៣០ ខែមករា ឆ្នាំ២០២៤។

ជាលទ្ធផល តាមរយៈការធ្វើតេស្តបឋម មន្ត្រីជំនាញបានរកឃើញ ពពុះសណ្តែក ផ្ទុកសារធាតុគីមីបូរ៉ាក់ (Borax) ចំនួន ៩គីឡូក្រាម ទំនិញចម្រុះរួមមាន គ្រាប់ពូជចំរុះ ឡេ យិនសិន ហួសអាយុកាលប្រើប្រាស់និងពុំអនុលោមតាមបទដ្ឋានព័ត៌មានអ្នកប្រើប្រាស់ចំនួន ៣២,៤៥គីឡូក្រាម និងទំនិញរំលោភបំពានសិទ្ធិផ្តាច់មុខចំនួន ២០៨,២២គីឡូគ្រាម។

មន្ត្រីជំនាញ ក.ប.ប. បានឱ្យដឹងទៀតថា ទំនិញដែលពុំមានមិនអនុលោមភាព ត្រូវបានដកហូត យកមករក្សាទុកនៅស្នាក់ការសាខា ដើម្បីបន្តនីតិវិធី។

ទន្ទឹមនោះ មន្ត្រីជំនាញ ក.ប.ប. ក៏បានពន្យល់ណែនាំឱ្យអាជីវករត្រូវយកចិត្តទុកដាក់ថែទាំទំនិញ និងតាំងលក់ផលិតផលដែលមានអនុលោមភាពស្របតាមច្បាប់ជាធរមាន៕